सार्वजनिक गणेश उत्सव मंडल कोलाड येथे जागर हिंदू संस्कृतीचा हळदीकुंकू व मंगळागौरी कार्यक्रम उत्साहात

प्रतिनिधी महेश जंगम (स्वामी)

रायगड (रोहा-कोलाड) :- रोहा तालुक्यातील कोलाड व रोहा शहर परिसरात महिलांसाठी हळदीकुंकू आणि मंगळागौरीचे पारंपरिक कार्यक्रम मोठ्या उत्साहात पार पडले. महिलांच्या उत्स्फूर्त सहभागामुळे कार्यक्रमांना विशेष रंगत आली.कोलाड येथे सार्वजनिक गणेशोत्सव मंडळाच्या वतीने हळदीकुंकू समारंभाचे आयोजन करण्यात आले होते. पारंपरिक पद्धतीने महिलांनी एकमेकींना हळदीकुंकू वाहून स्नेहबंध दृढ केले. या प्रसंगी विविध सांस्कृतिक उपक्रम आणि मनोरंजनात्मक खेळांचे आयोजन करण्यात आले. महिलांनी गाणी, नृत्य आणि हलक्या-फुलक्या खेळांमधून मनसोक्त आनंद लुटला.दरम्यान, रोहा शहरातील सदाफुली ग्रुप रोहा मंडळाच्या वतीने मंगळागौरीचा कार्यक्रम पारंपरिक जल्लोषात पार पडला. या कार्यक्रमात महिलांनी नऊवारी नेसून पारंपरिक वेशभूषेत सहभागी होऊन फुगड्या, खेळ व गाणी यांचा आनंद घेतला. वातावरण उत्साह, आनंद आणि स्त्रीशक्तीच्या ऐक्याने भारावले होते.या दोन्ही उपक्रमांना परिसरातील महिलांचा उत्स्फूर्त प्रतिसाद लाभला. “अशा कार्यक्रमांमुळे परंपरा जपली जाते, स्नेहबंध वृद्धिंगत होतात आणि महिलांना एकत्र येऊन आनंद साजरा करण्याची संधी मिळते,” असे समाधान आयोजक मंडळाच्या पदाधिकाऱ्यांनी व्यक्त केले.

Advertising Space